خليك بطاطس
عارفين ليه البطاطس المحمرة هية الاكلة الوحيدة اللي اجتمع الناس كلهم علي حبها ؟
البطاطس المحمرة لما بتتقلي في الزيت بتبقي عادة مقرمشة من برة و طرية من جوة-عشان كدة لما حد يعمل معاك موقف سخن اوي ماتعملهوش وحش اوي ..ايوة حاسسه انك زعلان منه و خد موقف بس خلي قلبك ابيض و وطري "طيب يعني " مش ناشف و سامح عشان ربنا بيسامح ….
– البطاطس المحمرة تلاقيها عند ماكدونالدز و برضه تلاقيها عند بتاع الفول والطعميه
يعني انت كمان خليك زي البطاطساية ماتتكبرش علي حد وصاحب كل الناس غني او فقير
– البطاطس المحمرة بتتقدم مع حاجات كتير : مايونيز , كاتشب صالصات مختلفة و ساعات كمان طحينة بس بتفضل في الاخر اسمها بطااااطس – يعني مهما اتعرضت لثقافات وبيئات مختلفة احتفظ دايما بشخصيتك المستقلة و طريقة تربيتك و خلي الناس هية اللي تتاثر بيك
– البطاطس بارضه ممكن تبقي شيبسي و هي اول حاجة بنفكر فيها لما بنحس بالجوع و احنا برة البيت- ساعد الناس دايما وخليك اول واحد ييجي علي بالهم لما يقعوا في مشكلة خليك جدع زي "الشيبسي"
– البطاطس المحمرة لو اتهرست بتبقي بارضه طعمها حلو و ممكن نسميها "بطاطس بيوريه"-مهما الدنيا تهرس و تبهدل فيك خليك شخص كويس و لذيذ و طلع للدنيا لسانك و قول "انا بطاطساية بيوريه عشان تبقي محبوب من كل الناس
